UDAk Aretxabaletara eraman du derbia

Norgehiagoka estua eta borrokatua izan da Agorrosinen Bergarak eta UDAk jokatu dutena. 14. minutuan Andoni Bretañak bere atean sartutakoa izan da partiduko gol bakarra. Bigarren zatian bergararrak saiatu dira partidua berdintzen. Adorea eta kemena bai, baina aukera garbiegirik ez. Korner batean, Markel Ilzarberen eta Julen Iñurberen burukada bikoitza izan da goletik gertuen ibili dena. Aretxabaletarrek bigarrena eskura izan dute kontraeraso batean lehenik, eta langan jo duen jaurtiketa batekin gero. Azkenean, baina, markagailua ez da mugitu (0-1).

"Gehiago merezi izan dugula uste dut. Aurreko astean ere gol goiztiar bat sartu ziguten, eta ezin buelta eman, eta gaur gauza bera. Ondo ari gara lanean, eta sentsazioak ez dira hain txarrak, baina emaitzek ez digute laguntzen", azaldu du Paul Valgañonek, Bergarako jokalariak –bi hilabete lesionatuta daramatza, eta harmailatik ikusi du partidua–.

Txanponaren beste aldean, pozik agertu da Beñat Illarramendi UDAko jokalaria, etxetik kanpo lortutako lehenengo garaipenaren ostean. "Hemen beti da zaila irabaztea, eta derbia izanda, are gehiago. Pozik gaude garaipenarekin, eta ea horrela jarraitzen dugun", adierazi du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.