Danobat Group-en bikaintasun zentroa
Danobat Group-ek Bikaintasun Zentro bat inauguratu du Shanghain, Txinako merkatuan duen presentzia indartzeko eta bezeroei balio erantsiko zerbitzua emateko asmoz. Makina-erreminta eta produkzio sistema aurreratuen fabrikatzailearen instalazio berrian buruak konpontzeko tailer bat dauka ekipatuta, ordezko piezetarako biltegi bat, balio erantsi handiko makineria erakusteko show-room bat eta bulego gune bat.
Instalazioak Danobatgroupek Txinan duen zerbitzuen eskaintza handitzen du, eta bere helburua da Asiako herrialdean salmentak bultzatzea, bereziki erreparatuta Shanghaiko inguruari, herrialdeko industria gune nagusietakoa izanik. 2-3 urtean, taldeak era nabarmenean hazi nahi du salmenta bolumena Txinako merkatuan.
Fagor Arrasateren hamargarren urteurrena
Fagor Arrasatek, Shanghaiko plantaren hamargarren urteurrena ospatu du eta horretarako, foro teknologiko bat burutu du. Azken 10 urtean erreferente moduan finkatu da Fagor Arrasate Txinan, prentsa eta estanpaziorako instalazio automatikoetan zein ebaketa lerroetan, izan altzairuzkoak zein aluminiozkoak, eta herrialde horren aldeko apustu indartsua egiten jarraituko du.
