Foru Aldundiko ordezkari moduan Markel Olano diputatu nagusia eta Garbiñe Mendizabal Hizkuntza Berdintasuneko zuzendaria izan ziren bertan. Eta Olanok azpimarratu zuen Abbadia sariaren historian lehenengo aldia zela guztiak elkartzen zirena. Bestalde, dagoeneko gure artean ez dauden sarituak ere kontuan izan zituen.
Diputatu nagusiak gaineratu zuen, Euskaraldia bezalako ariketa linguistiko batek arrakasta izan dezan, beharrezkoa dela euskara biziberritzeko norbanakoen, gizartearen eta Administrazioen arteko "ahaleginak batera joatea" eta elkarrekin "indar egitea".
Abbadia saria jaso zutenen euskal zaletasuna ere azpimarratu zuen eta eredu izateagatik eskerrak ere eman zizkien.
Euskaraldiari dagokionez, berriz, egitasmoarekiko duen inplikazio pertsonalaz hitz egin zuen Olanok.
Garbiñe Mendizabalek, bere aldetik, nabarmendu zuen Euskaraldia ekimen egokia dela Gipuzkoako herri-erakundeetan eta Foru Aldundian bertan ere euskara bultzatzeko, eta egunerokoan aho biziek eta belarri prestek duten garrantzia azpimarratu zituen.
