Adin guztiendako ikuskizuna ekarriko duzu Elgetara?
Bai, familia osoarendako da. Ilusio handiak egingo ditut, eta saioan elkartuko ditut bertan azken hamarkadan sortzen joan naizen trikimailu ikusgarrienak. Amaieran, 500 litro ur dituen edukiontzi batean sartuko naiz lotuta eta kateatuta, eta ihes egiten saiatuko naiz. Nik bakarrik egiten dut trikimailu hori Espainia mailan.
Mago ezaguna zara: Harri Houdini antzezten duzu Club Houdini telesailean, eta estatu mailako sari bat ere jaso duzu.
Bai. Beste trikimailu batengatik eman zidaten saria, eta hori ere ikuskizunean dago. Umoreak eta gertuko magiak ere izango dute tartea Espaloiko saioan.
Publikoak parte hartzeko aukera izango du?
Behin baino gehiagotan! Gustatzen zait emozioekin jolas egitea. Sorpresa, harridura, tentsioa eta beldurra eragiten ditut saioan. Neurrian, noski!
Aste bukaera berezia da hau arima herratuendako. Haiekin ere egiten duzu jolasean?
Saiatzen naiz. Gauzak ondo bidean arima herratu horietako bat gure artean izango da ikuskizunean. Ea egoera kontrolpean mantentzen dugun.
