AEDk antolatuta, 250 lagunek hartu dute parte gaurko lasterketan. Giroa hotza zen irteeran, baina euria egiteari utzi dio 17:00ak aurretxoan, eta korrikalariak ez dira busti ibilbidean. Proba erritmo bizian hasi da, eta mutiletan azkar nabarmendu dira bizkorrenak. Lehenengo hiru kilometroak elkarrekin egin eta gero, Endika Donayk ezin izan dio Aitor Mimenzari segi, eta hortik aurrera bakarka jardun dute biek. Hirugarren postuan beste arrasatear bat nabarmendu da Elorregi inguruan, bere burua indarrez ikusi eta bakarrik geratu da Unai Ibarra. Eta horrelaxe amaitu dute lasterketa.
Emakumezkoetan, Marisol Ramos jarri da buruan hasieratik, eta horrela eutsi dio amaierara bitartean, bigarrenarekiko eta hirugarrenarekiko tarte politarekin beti. Podiumeko kutxen jabeak, baina, aldatuz joan dira. Ane Zabala arrasatearrak indartsu hasi du lasterketa, eta Elorregiraino bigarren joan da. Inguru hartan harrapatu du Miren Apraizek, eta Arrasatera iritsi baino lehen atzean utzi ere bai. Herrigunera podiumeko postuan sartu da Zabala, baina azken metroetan atzetik zetorren Maialen Loyok ere gainditu egin du. Laugarren postua eta emakume beterano onenaren saria lortu ditu azkenean. Mutiletan, Fernando Nogales izan da beterano onena –sailkapenean bosgarren–.
Oñatiar onenen sariak Sergio Gartziak eta Edurne Elkoroiribek jaso dituzte –beste sariren bat zuten korrikalariak ez dituzte aintzat hartu–, eta arrasatear onenenak Ander Zurbanok eta Leire Balzategik.
Taldeka, Oñatiko Abixaranek eta Arrasateko Biziprestek eskuratu dute saria.
Antolakuntzatik adierazi dutenez, ibilbidearen noranzko aldaketa ere gustuko izan dute, oro har, parte-hartzaileek.
