Ikusmina handia piztu du Carlos Verrmuten Quién te cantará filmak. Duela lau urte Zinemaldiko garailea izan zen Magical Girl pelikularekin eta duela aste gutxi Torontotik iritsitako kritika positiboek, ikusmira areagotzea baino ez dute lortu.
Oraingo honetan Vermut Quién te cantará melodramarekin etorri da Donostiara. Musika, sekretuak... eta guztiaren erdian bi emakume. Lehena abeslari ezagun bat, eta bigarrena bere fan sutsua den talentu handiko emakume arrunt bat. Zerk batuko ditu biak?
Epaimahaiak banatzen ditu saria, baina prentsak atzo eta ikusleek gaur Kursaalean izandako harrerari kasu egiten badiogu, filma sariak lortzeko kinielan sartu da bete-betean.
Naomi Kawase zuzendari japoniarrak ere oso zapore ona laga du. Vision asiako zinearen eskema goitik behera errepikatzen du eta Kawaseren lana ederra da. Atzo jakin genuen, zuzendaria ez dela Donostian egongo eta Juliette Binoche aktoreari tokatuko zaio lan hau defendatzea. Lehen paseetan filmak lortutako babesa ikusita, Binochek, ez du arazo handirik izango.
Askotan gertatzen den bezala, Vision ez da pelikula erraza, lehenago aipatu moduan asiako zinea gustuko dutenek soilik ulertuko dituzte filmean zehar dauden flashback eta sintoismoari egiten zaizkion keinu guztiak.
Saria 'Handia' filmarendako
Dudarik gabe pasa de urteko euskal pelikula izan zen Handia. Zine komertzialetan izandako oihartzuna ez ezik, hainbat zinema jaialditan ere ikusi dute Altzoko erraldoiaren istorioa. Migel Joakin Eleizegiren bizitzak izandako arrakasta saritzeko EZAE, Euskadiko zine aretoen elkarteak, Handia saritu gura izan du.
Laugarren urtez banatzen den sari honek pelikularen "arrakasta eta kalitatea" azpimarratzera dator. Moriarti ekoiztetxeko kideak izan dira ekitaldian Aitor Arregi eta Jon Garaño buru zeudela.
