Ulma Packaging-ek 100 langile kontratatuko ditu hamar hilabetetan

Eneko Azurmendi 2018ko ira. 20a, 17:35
Goribar auzoko planta handitu egingo dute, "ia bikoiztu".

Hamar hilabete inguruko epean 100 langile inguru kontratatzea aurreikusten du Ulma Packaging-ek, enpresaren etengabeko hazkundea dela eta. Profil askotariko langileak izango dira, beharra ere arlo ezberdinetan dagoelako, Ulma taldearen esanetan. Bestalde, Goribar auzoko planta handitzeko lanak hasi dituzte dagoeneko.

Kontratazioak "aurreikusitako beharren arabera" egingo dituztela azaldu du Ulmak. "Hazkundea arlo guztietan gertatzen ari da; beraz, behar ditugun eta behar izango ditugun langileen profila askotarikoa izango da".

Hala, ingeniariak, proiektu gestoreak, Lanbide Heziketako langileak, teknikariak, muntatzaileak, produktu industrialen salerosketan adituak, galdaragileak, eta abar izango dira kontratatuko dituztenak.

Kontratazio berrien zati garrantzitsu bat ikasleei eta titulazioa eskuratu berri dutenei zuzenduta egongo da. "Izan ere, guztientzako tokia dago hemen. Esperientzia handiko jendea daukagu, baina talentu gazteen beharra ere badugu".

Planta berria handitzen

Ulma Packaging-ek Oñatiko Goribar auzoan duen planta handitu egingo dute. Egun, eraikinak 5.000 metro karratu ditu; alboan 4.000 metro karratuko eraikin bat gehituko zaio. Beraz, "ia bikoiztu" egingo dute Goribarko planta. "Packaging izaten ari den hazkundearen erakusle da planta berria ere txiki geratu izana".

Dagoeneko hasi dituzte planta handitzeko lanak. Aste honetan hasi dira alboan zegoen eraikina botatzen, eta ondoren ekingo diete eraikina handitzeko lanei. Alberdik adierazi duenez, 2019ko uda aurretik amaitu gura dituzte plantaren handitze lanak, "ekain alderako edo".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak