Azkue Fundazioak Euskal Herriko kultura-ondarearen argazkiak sarituko ditu Wikipedian

Azkue Fundazioak Euskal Herriko kultura-ondarearen argazkiak sarituko ditu Wikipedian
2017ko Euskal Herriko argazki onena: Egunsentia Gaztelugatxen. / Egilea: Ebaki

Wiki Loves Monuments argazki lehiaketa antolatzen da urtero Wikipedian, 2012az geroztik. Lehiaketa horren baitan, Azkue Fundazioak Euskal Herriko kultura-ondasunen argazkiak ere saritzen ditu. Helburua Wikipediako Gizateriaren Ondareari buruzko artikuluak hobetzea.

Irailaren 1etik 30era bitartean egongo da martxan lehiaketa. Argazkiak Euskal Herrikoak zein lehiaketan parte hartzen duten beste edozein herrialdetakoak izan daitezke. Partaide bakoitzak, nahi adina argazki igo ditzake eta edozein momentutan ateratakoak onartzen dira.

Nazioarteko lehiaketaz gain, Azkue Fundazioak Euskal Herriko sariak eskaintzen ditu, euskarazko Wikipediarako argazkiak ateratzen dituztenentzako. Arabako, Bizkaiako, Gipuzkoako, Lapurdiko, Nafarroa Beherako, Nafarroako eta Zuberoako irudiekin hartu daiteke parte Azkueren Euskal Herriko ondare-lehiaketan. Iazko edizioan, 722 argazki jaso ziren Wiki Loves Monuments lehiaketan.

2018ko sariak

Euskal Herriko hiru sari eskaintzen ditu Azkue Fundazioak:

  • Euskal Herriko argazkirik onenari: Parrot Mambo Fly dronea.
  • Bizkaiko argazkirik onenari: Hero Session waterproof Go-proa.
  • Bilboko argazkirik onenari: Telefonoarekin argazki eta bideoak egiteko produktu sorta.

Horretaz gain, nazioarteko lehiaketak beste hamahiru sari emango ditu.

Lehiaketaren helburua

Wikipediako irakurle, lankide, argazkilari edo argazkigintzaren zaleak kultura-ondare diren monumentuen argazkiak egitera animatzea bilatzen da lehiaketarakin, Wikimedia Commonsera igoz, Wikipedian erabili ahal izateko. Horrela, Gizateriaren Ondareari buruzko artikuluak hobetu nahi dira.

Lehiaketan parte hartzeko informazio guztia Wikipediako Wiki Loves Monuments 2018 atarian.