Levantek Aitor Fernandez fitxatu du

Azken bi denboraldiak Numantzian egin eta gero Aitor Fernandez Abarisketak Mediterraneo alderako bidea hartuko du ostera ere, Levantek fitxatu duelako. Soriako taldeari milioi bat euro ordainduko dio Levantek –arrasatearrak duela gutxi berritu zuen kontratua– eta lau urterako kontratua sinatu du.

Lehenengo mailara salto egiteko aukera izango du Aitor Fernandezek (27 urte) Levanteren eskutik. Numantzian egindako denboraldi onak eman ditu fruituak, eta hainbat astez zain egon eta gero Realaren interesekoa zen atezainak Levantera joatea erabaki du.

Hor erabakigarria izango zen, seguruenik, Rulli Realean geratu izana, eta hasieratik Levantek erakutsi duen interesa ikusita, Fernandezek ez du zalantzarik izan zituen hautagaien artean aukeratzerako orduan. Bada, bihar, martitzena, eguerdian aurkeztuko dute jokalaria ofizialki, Ciutat de Valencia estadioan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.