Ford enpresak segurtasun produktuen bikaintasun saria eman dio Fagor Ederlani

Joe Hinrichs, Fordeko lehendakariorde exekutibo eta Eragiketa Globaletako lehendakaria, Hau Thai Hang, Fordeko Produktu Garapeneko eta Erosketetako lehendakariorde exekutiboa eta Javier Egurcegui, Fagor Ederlaneko Marketing burua.

Bikaintasunaren SAFE saria eskuratu du Fagor Ederlan kooperatibak, Ford Motor Companyren eskutik. Enpresa estatubatuarrak, logistikan, balioetan eta berrikuntzan, esperotako maila gainditzen duten hornitzaileei ematen die Bikaintasunaren Munduko Saria. Aurtengo edizioan, milaka hornitzaileren artean 88 aukeratu ditu Fordek finalista moduan, horien artean Fagor Ederlan saritu du.

Maiatzaren 18an Dearborn hirian (Michigan, AEB) egindako sari banaketan jaso zuen Fagor Ederlanek, segurtasun produktuen kategoriako bikaintasun saria. Joe Hinrichs, Fordeko lehendakariorde exekutibo eta eragiketa globaletako lehendakaria, eta Hau Thai Hang, Fordeko produktu garapeneko eta erosketetako lehendakariorde exekutiboaren eskutik jaso zuen saria Fagor Ederlanek.

Thai-Tangek nabarmendu zuenez, "Fagor Ederlanen moduko hornitzaileak funtsezkoak dira Forden arrakastan, mundu mailako mugikortasun konpainiarik ezagunena izatera heltzeko egiten duen ahaleginean arrakasta izaten laguntzen baitiote".

Fagor Ederlaneko zuzendari nagusiak, Marcial Iruretagoienak, eskertze hitzak izan zituen Fordendako: "Eskerrak ematen dizkiogu Ford Motor Companyri, automobilaren industria seguruagoa eta iraunkorragoa izaten laguntzen duten produktuak diseinatzen eta garatzen eskaini diogun laguntza zabala aitortzea guretzat ohore handia izan delako".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.