Domekan Delteko GBC taldeak Divina Seguros Joventut taldearen kontra jokatuko du, eta partidu berezia izango da, zalantza barik, urtetan Aloña Mendiko elastikoa defendatu duen Zumarragako Asier de la Iglesiarendako. Azken partidu horretara begira, eta esklerosi anizkoitzaren aldeko borrokan oihartzun mediatikoa emateko, talde gipuzkoarrak De la Iglesia fitxatu du –azken denboraldi honetan EBAn denboraldi nabarmena egin du Zumarragakoak, hainbatetan izan da jardunaldiko MVP–.
Bada, 35 urteko jokalariak –29 urterekin esan zioten esklerosi anizkoitza zuela– ACBn debuta egin dezake asteburuan. Gaixotasunari neurria hartu bitartean bertan behera utzi zuen saskibaloia, baina poliki-poliki kantxetara itzultzen hasi zen, eta Oñatiko taldearen urrezko urteen ondoren ere txantxikuekin jokatzen jarraitu zuen, baina liga xumeagoetan –Aretxabaletan, esaterako, gaixotasunaren kontra dirua batzeko hirunako saskibaloi torneoa antolatu zuten–. Orain, saskibaloiaren gorenera iritsi da, nahiz eta partidu bateko kontua izan.