Lokatza taldeko bost txirrindulari podiumean BTT jaitsieretako Euskadiko Openean

Larraitz Zeberio Lekuona 2018ko mai. 15a, 12:50

De Vega, Jon Larrea, Odriozola, Castro eta Unai Larrea sari banaketa ostean, Igantzin.

Zapatuan jokatu zuten txapelketa Igantzin (Nafarroa) eta lider egin dute Jon Larreak —kadete 1—, Txomin de Vegak —master 30— eta Manu Castrok —master 40—. Bigarren egin dute Ibon Odriozolak eta Unai Larreak kadete 2 eta 23 urtetik azpikoetan, hurrenez hurren.

Euskadiko txirrindulari federazioak antolatuta jokatu zen zapatuan BTT Euskadi Open-DH txapelketa Igantzin. Bost debagoiendar izan ziren podiumean eta nork bere kategoriari dagokion saria jaso zuen.

Lokatz eta ur handiko proba izan zen. Betibehera taldeko Iraitz Etxebarriak egin zuen denbora onena gizonetan; 3:04-34. Emakumeetan kadete mailako Hondarribia txirrindulari elkarteko Naroa Aranbarrik irabazi zuen; 5:36-79.

Lokatzakoak ondo

Lehenengo urteko kadeteetan Jon Larrea izan zen onena, Master 30 kategorian Txomin de Vega elgetarra eta Master 40 kategorian Manu Castro. Bigarren postua egin zuten bigarren urteko kadete Ibon Odriozolak zein 23 urtetik azpikoa den Unai Larreak.