UDAk ez du mailari eusteko beharrezko garaipena lortu Mondraren aurrean (2-2)

UDAren eta Mondraren arteko atzoko derbiko jokaldi bat.

UDAk beharrezkoak zituen hiru puntuak Erregional Preferente mailari eusteko helburuari jarraiki, baina aretxabaletarrek ezin izan zuten garaipenik lortu. UDAk aukera asko ditu mailaz jaitsi eta hurrengo denboraldian Lehen Erregional mailan jokatzeko. Mondra, helburua beteta zuela, minutu gutxien izan dutenei protagonismo gehiago eman eta presio barik irten zen lehiatzera. Amaiaren, binako berdinketa.

Puntu beharrak hala aginduta, UDA indartsu zelairatu zen, partiduaren bila. Zuri-moreek, baina, hasierako erauntsi horri ondo eutsi eta minutuak aurrera egin ahala parekatzen joan ziren indarrak. Hala ere, uneoro igarri zen ze taldek zuen garaipenaren beharra. Mondra jarri zen aurretik, korner baten gola egin ostean. Atsedenaldira 0-1koarekin joan ziren.

Futbol gutxi, presio handia

Bigarren zatian, eta Mondrak ohikoak ez diren jokalari dezente zelairatu zituenez, arlo fisikoa igarri egin zen. Aretxabaletak ondo estutu zuen baina, futbolaren berezitasunak, 0-2koa egin zuen Mondrak ondo landutako jokaldi bati esker. Apenas ezer egin barik, zuri-moreek eskuetan oso bideratuta zuten garaipena. Hala ere, zelai erditik atera eta 30 segundotan 1-2koa egin zuen UDAk eta oso gutxira heldu zen binako berdinketa. Orduan hasi ziren Mondraren minuturik zailenak eta aretxabaletarrak erasoaldi gogorrenak, baina etxekoek ez zuten sortutako aukerekin asmatu. UDAk gehiago merezi izan zuen, baina ez zen posible izan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.