Emakumeen Bira egingo dute maiatzaren 19tik 22ra bitartean, eta aurtengoa, lehenengoz, Emakumezkoen UCI World Tour barruan egongo da. Bada, hirugarren etapa –maiatzak 21, astelehena– Aretxabaletan hasi eta amaituko dute, eta etapa hori antolatzeko ardura duten UDAko ordezkariek etapa ikusgarria bezain teknikoa aurreikusi dute. Besteak beste, Aramaioko auzoetako errepideetan barrena ibiliko dira ziklistak.
Birako etapa luzeena izango da Aretxabaletakoa (122 kilometro), eta bezperan Agurain eta Gasteiz artean egingo duten erlojupekotik ondo errekuperatzen ez denak zailtasunak izango ditu, gorabehera handiko etapa izango da eta.
Etxaguendik eta Azkoagatik
Lasterketa 15:30ean hasiko dute, Aretxabaletan, eta, kilometro gehienak bailaran egingo badituzte ere, Arlaban igo eta Kruzeta jaitsiko dute, Legutiotik bueltan. Kuriosoena da, baina, etapak Aramaioko lurretan kilometro dezente egingo dituela, eta, besteak beste, ziklistak Etxaguengo bidegurutzera igoko direla eta Arexolatik bueltan jaitsiko direla Ibarrara. Eta handik Aretxabaletara joango dira, baina Azkoagatik eta Untzillatik pasatuta.
