Bergarako Musika Eskolako eta Arrasate Musikaleko gazte bandek, hurrenez hurren, zabaldu zuten kontzertua. Ondoren etorri ziren Soraluzeko haurren abesbatza; Eskoriatzako Beheko Errota eta Aretxabaletako Leizarra musika eskolakoen konboak, segidan; eta oñatiarrek borobildu zuten folk doinuekin errepertorioa. "Oso ondo joan zen dena, aurreikusi moduan oso musika ezberdinak entzuteko aukera izan genuen; hortaz, bai publikoa eta baita musika eskolako kideak gustura eta pozik. Horixe komentatzen genuen eskola guztietako arduradunek kontzertua bukatutakoan eskaini genien luntxean. Datorren urtean Soraluzen elkartzeko hitzordua finkatuta dugu dagoeneko", azaldu du Bergara Musika Eskolako zuzendari, Marije Ugaldek.
