Ford Mugarri gailendu da derbian, eta Zarautzen aurka jokatuko du bihar finala

Denboraldiko hirugarren partidua zuten elkarren aurka Ford Mugarri Arrasatek eta Fagor Industrial Aloña Mendik, eta beste bietan moduan, arrasatearrak gailendu dira azken honetan ere (27-22). Igoerako aurre-faseko finalerdia izan da gaurkoa, eta, beraz, Ford Mugarrik jokatuko du biharko finala, Txikipolit ZKE-ren aurka. Izan ere, beste finalerdian, 24-18 irabazi diete zarauztarrek Ilcapo Hondarribiari.

Ford Mugarrik joko hobea erakutsi du hasieratik, eta ate aurrean ere eraginkortasun handia izan du partidu guztian zehar. Oñatiarrak, ordea, deseroso ibili dira eta kostatu egin zaie golak sartzea. Besteak beste, Asier Valle atezainaren partidu bikaina izan da horren erantzule.

Oñatiarrek aurpegi tristea zuten amaieran, eta Mikel Agirrek, taldeko kapitainak, onartu du pena izan dela finalerako ez sailkatu izana. "Ondo prestatu dugu partidu hau. Ilusioarekin gentozen, eta dena ematen saiatu gara, baina ezin izan dugu irabazi. Erasoan ez da gure partidurik onena izan, eta markagailuak hori erakusten du. Defentsan gogor aritu dira eta atezainak guztia eta gehiago geratu digu. Atezain bat horrela dagoenean, gutxi dago egiteko", adierazi du.

Txanponaren ifrentzuan, arrasatearrak pozik. Mikel Zuloaga taldeko jokalariak azaldu du partido gogorra aurreikusten zutela, eta hala izan da, bere esanetan. "Presio handiko partidua izan da. Harmailak ere goraino beteta zeuden. Hala ere, uneoro aurretik joan gara eta horrek lagundu egin digu. Oso parekatuta gauden bi talde gara, asko ezagutzen dugu elkar, eta detaileek erabakitzen dute partidua. Gaur, zorionez, alde izan dugu emaitza", azpimarratu du.

Gauzak horrela, aurre-faseko finala Ford Mugarrik eta Txikipolit ZKE-k jokatuko dute bihar, 12:15ean, Iturripen.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.