Elosuan gora Movistarrek erakustaldia egin arren, etapa Omar Frailek irabazi du

Txirrindulariak Bergaran.

Euskal Herriko Itzuliko bosgarren etapa Debagoienetik pasa da. Aramaiotik sartu dira txirrindulariak eta Bergaran gora egin dute, Elosuara. Mendate horretan, hain zuzen, gogor egin du lan Jon Izagirreren Movistar taldeak. Hala ere, ezin izan du Izagirrek etapa irabazi. Eibarreko helmugan azkarrena Omar Fraile izan da.

Gaurko etapa Gasteizen hasi da eta Eibarren amaitu. 164,7 kilometroko lasterketan Astana taldeko Omar Fraile izan da azkarrena. Harekin batera sartu dira helmugan Primoz Roglic liderra eta Jon Izagirre, besteak beste. Etapa polita izan da, bizia, eta bailarako zaleek ziklismoaz gozatzeko parada izan dute.

Esprint berezia Bergaran

Bosgarren etapa hau Debagoienetik pasa da. Aramaion sartu da bailarara eta Bergaratik irten. Gainera, Bergaran, esprint berezia izan dute txirrindulariek. Azkarrena Hindley izan da –3 puntu–, bigarren Fraile –2 puntu– eta hirugarrena McCarthy izan da –puntu bakarra–.

Bergaratik Elosuarako bidea hartu dute. Bigarren mailako mendatean gora Movistarrek erritmo bizia jarri du, eta tropel buruan jarri dira. Elosuako gainean azkarrena Padum izan da.

Sailkapen nagusia

Gaurko etaparen ondoren bi euskaldun sartu dira sailkapen nagusiko podiumean: Mikel Landa eta Jon Izagirre. Primoz Roglic dago sailkapeneko buruan, Landa 1:58ra dago, eta Izagirre 2:13ra.

Bihar azkeneko etapa

Bihar amaituko da Itzulia Eibar eta Arrate artean jokatuko den etaparekin. 122,2 kilometroko lasterketa izango da, eta bihar ere bailaran egingo dituzte kilometro batzuk. Elgetatik sartuko da lasterketa eta Osintxutik irtengo da. Hortaz, bailarako zaleek bihar ere ziklismoaz gozatzeko aukera izango dute.

Erlazionatuak

Zaleak Gorlan Itzulia ikusten

Debagoiena

Debagoieneko hainbat txirrindularitza zale elkartu ziren atzo Gorlan Itzuliko bosgarren etapa ikusteko. Eguraldia lagun izan zuten eta gustura ikus...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.