Nogen talde donostiarraren txanda izan zen aurrena. Folk, pop eta indie musika uztartzen dituen talde gazteak zuen onena eman zuen oholtza gainean, eta hori ondo islatu zen jendearen aurpegietan. Musika dantzagarria da boskotearena, eta bertaratutakoek ez zuten aukera hori alperrik galdu.
Publikoa lehen lerroetara hurbiltzeko lana Nora abestiak egin zuen, talde donostiarra ezaguna egin zuen abestiak, hain zuzen. Hortik aurrerako guztia olatu berean joan zen emanaldi amaierara arte. Ikus-entzuleak gustura gelditu ziren emaitzarekin, eta donostiarrek ere eskertu zuten publikoaren berotasuna.
Anita Parkerren txanda izan zen ondoren. Oso bestelako doinuak entzungai. Elektro-swing eta rap estiloak nahasten dituen laukoteak ez zuen hutsik egin eta gaztelekuan geratu zirenek eskertu zuten hori. Iñaki Bengoaren elektronika ukituak ziren nagusi, Ane Martinezen ahots goxoarekin modu bikainean uztartzen zirelarik.
Laburbilduz, goi mailako euskal musikaz gozatzeko aukera izan zuten bertaratutakoek, eta kanpoan zegoen giro haizetsu eta euritsuari aurre egiteko erremedio bikaina izan ziren bi taldeak.