Maila ez galtzeko lehian da Arrasate-Arlutz xake taldea

Bi jardunaldi besterik ez zaie geratzen denboraldia bukatzeko. Zapatuan dute hurrengo hitzordua.

Ohorezko Mailan segitzeko lehian da Arrasate-Arlutz xake taldea, eta bi jardunaldi dituzte jokatzeke. Zapatuan dute lehen hitzordua, Aretxabaletako lokalean –Irala plazan–, Tuterako Santa Ana taldearen kontra, 16:00etan. Eta ohi moduan jardungo dute: Josu Tornayk lehen xake-taulan; Asier Etxagibelek bigarrenean; Aitor Alcaidek hirugarrenean; eta Txema Hernandok, berriz, laugarrenean.

Gaur-gaurkoz, azken postuan dira Arrasate-Arlutzekoak, Abadiñoko xake taldekoekin berdinduta –hamar talde daude, eta bi jaitsiko dira–. Dena den, ez dute amorerik eman, eta azken bi partiduetan goraka egiteko esperantzarekin dihardute: "Ez jaisteko lehian dauden zenbait taldek hitzordu gogorrak dituzte; ahalegin handiak egin beharko dituzte punturen bat eskuratu gura badute. Geuk, ordea, konfiantzarekin dihardugu. Hala, gutxienez, berdinketa bat lortu nahi genuke Santa Anaren kontrako lehian", azaldu du Josu Tornayk, Arrasate-Arlutz xake taldeko kideak. Berdintzekotan, bi puntu lortuko lituzkete –lau puntu daude jokoan–, eta, ondo bidean, zazpigarren sailkatuaren parean hasiko lukete azken jardunaldia; gaur-gaurkoz, Santurtzikoak daude zazpigarren postuan, bederatzi punturekin.

Azken jardunaldia, Burgosen

Martxoaren 10ean emango diote bukaera denboraldiari, Miranda de Ebron (Burgos); Irungo Batalla xake taldea izango dute aurkari. Hain zuzen ere, azken jardunaldia izanda, martxoaren 10ean txapelketako talde guztiek jardungo dute bertan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.