goiena.eus

Herrialde denetako ikastoletako ikasleak Himalaiara eramango dituen proiektuko lehen kontaktua

  Euskara  Debagoiena  Oñati

Mendia, xerpa hizkuntza eta euskara ardatz izango dituen proiektuan parte hartuko duten gazteek lehen kontaktua izan dute asteburuan. Felipe Uriarte da proiektuaren gidari, eta Oñatin batu du gazte kuadrilla: atzo bilera egin zuten proiektuaren nondik norakoak azaltzeko, eta gaur Aizkorrira egin dute irteera. Ondoren, herriko elkarte batean bazkaldu dute. Hurrengo elkartzen direnean Iparraldean izango da, eta ondoren Bizkaian eta Araban.

Herrialde denetako ikastoletako ikasleak Himalaiara eramango dituen proiektuko lehen kontaktua
Proiektuko kideak, gaur, Aizkorrin. | Ikusi handiago | Argazki originala

Hona hemen, gazteetako batzuen hitzak asteburuko egonaldiari eta proiektuari buruz:

Ineka Sarria, Baionako Etxepare lizeokoa: "Mendian ibiltzera goaz batetik, eta xerpen hizkuntza ere ezagutuko dugu. Biziki interesgarria izango da, berezia delako hizkuntza hori. Prestaketa moduan, hilabetero badugu ateraldi bat".

Unai Iturrieta, Atarrabiako Paz de Ziganda ikastolakoa: "Talde jatorra topatu dut. Lau animatu ginen, bik atzera egin dute, eta bi geratu gara. Esan zigutenean, izugarrizko ilusioa egin zigun. 15 urterekin, horrelako aukera izatea ez da ohikoa. Beste kulturak ezagutzea ederra izango da".

Jon Fombellida, Laudio ikastolakoa. "Balio izan digu asteburuak beste herrietako jendea ezagutzeko, eta bereziki proiektu honetan sinisten dugunok elkartzeko. Lehenengo minututik oso harreman ona izan dugu. Aizkorrirako txangoa ederra izan da, elurra oso ondo zegoen. Proiektua oso polita da, kultura aniztasuna, bi herriren arteko loturak estutzea, mendigoizaletasuna, eta dena euskararekin lotuta. Orain pentsatu behar dugu dirua nola lortu eta aurrera".

Malen Osa, Oñatiko Txantxiku ikastolakoa: "Izugarrizko esperientzia izango da, hango mendiak eta paisaiak ikusteko oso aukera ona, eta hango kultura ezagutzeko, jendearen ohitura... aukera polita da. Sorpresa atsegina izan zen gonbidapen hori jasotzea. Orain ezagutarazi behar dugu proiektua komunikabideetan, bere benetako asmoaren berri eman, eta gero dirua lortu, ze bidaia garestia da".

 

Erantzunak

Erabiltzailearen aurpegia Erantzuna | #1

Ekimen bikaina! Ikasteko asko dugu! Txapela buruan eta ibili munduan!!!! Bejondeizuela!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa