Maialen Lujanbio, txapeldun

Maialen Lujanbio, behin txapela irabazita. ARGAZKIA: Alberto Elosegi – XDZ

Maialen Lujanbio hernaniarrak irabazi du 2017ko Bertso Txapelketa Nagusia, bigarrenez. Lujanbiorekin batera, Aitor Mendiluzek lortu du buruz burukorako txartela; gaurkoan, bera izan da bigarrena. Berriz ere, jendez lepo zegoen BEC.

Ikusleek espero zutena eman dute bertsolariek: hitz erakustaldia. Lehen bertsotik erakutsi dituzte euren asmoak, eta indartsu hasi dute saioa. Osteko orduetan ere mantendu dute maila.

Gauzak horrela, entzuleak ez dira kexu. Hunkitzeko, barre egiteko eta hausnartzeko bertsoak izan dituzte, era guztietakoak. Eta, beste behin, emandakoa bueltatu diete bertsolariei, txalo zaparradarekin.

                                                                                                 Argazkia: Alberto Elosegi – XDZ
 
Saioaren bukaeran, txapela buruan, "pozik" azaldu da Lujanbio: "Gustura nago egindako saioarekin. Lanaren eta ibilbidearen txapela dela esan daiteke". Eta "gerokoei" eskaini die garaipena, agurrean:
 

Herri hau herri egin al dugu

ze eman du bizikidetzak

zenbat eman du euskalduntzeak

ez behar beste guretzat

berrogei urte ta garaia da

egurasteko ametsak

akaso hortan bertsolaritza

ona da adibidetzat

beti ez dugu goitik behera egiten

trasmisioaren trentzak

guk beti gora ikasi dugu

ta zabaldu muga ertzak

lehengoekin ta gaurkoengandik

txapel hau gerokoentzat

2017ko Bertsolari Txapelketa Nagusiko finaleko sailkapena:

1.- Maialen Lunanbio (1. 756 puntu).

2.- Aitor Mendiluze (1.684 puntu).

3.- Sustrai Colina (1.117 puntu).

4.- Amets Arzallus (1.136 puntu).

5.- Igor Elortza  (1.124 puntu).

6.- Aitor Sarriegi (1.107,5 puntu).

7.- Beñat Gaztelumendi (1.076,5 puntu).

8.- Unai Agirre (1.072,5 puntu).

Txapelketari buruzko solasaldia

Martitzenean, bertsolari txapelketari buruzko solasaldia egongo da ikusgai Goiena telebistan; 21:00etan hasiko da Mahai-ingurua saioa.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.