Harmaila aldizkariak kirola du ardatz, eta atera berri dute 1. zenbakia. Urtean bost ateratzeko asmoa dute, eta lan mardulak izango dira, "lasai irakurtzekoak"; lehen aleak adibidez 100 orrialde dauzka. Harpidedun egin behar da aldizkaria irakurri ahal izateko, online edota paperean. Aldizkaria hobeto ezagutzeko 0. alea online eta doan irakurtzeko aukera dago.
"Kirola eta kirolaria erdigunean jarriko ditugu, mamia landuz, azalean eta lardaskerietan geratu gabe, gaur egun kirolari leku askotan ematen zaion tratamendutik erabat aldenduz", azaldu du Iñaki Berastegi kazetariak.
Aldizkariaren filosofiaren euskarriak izango dira lurraldetasuna eta genero berdintasuna: "Euskal Herriko lurralde guztiei egingo diegu lekua, eta saiatu gara tokia ondo banatzen", nabarmendu du Eñaut Barandiaran gidoigile eta sortzaileetako batek.
"Harpidedunak behar ditugu"
Hasieran da Harmaila proiektua, eta aurrera egiteko harpidedunak behar dituztela nabarmendu dute hiru sortzaileek: "Ezinbestekoa zaigu harpidedun multzo zabala edukitzea proiektua bideragarria izan dadin. Animatu nahi ditugu Euskal Herriko kirolzaleak Harmailan eser daitezen gurekin batera. Ez zaie damutuko".
Urteko 40 euroko kuota ordainduta jasoko dira paperean urteko bost aleak, eta online bidezko harpidetzagatik 15 euro ordaindu behar dira. Harpidetza egiteko www.harmaila.eus webgunean sartu behar da, Denda atalean. Salmenta ere bultzatuko dute Euskal Herriko hainbat liburudenda eta kioskoetan, eta alea 10 eurotan egongo da salgai.
