Gaur bukatu da Edesa Industrialen eta enpresa komitearen arteko kontsulta epea, eta enpresak gaur aurkeztu die langileei Lanbide Erregulazioko Espedienteaz kanpo geratuko direnen zerrenda. Azkenean, 160 barik, 163 izango dira. 55 urtetik gorakoek lanpostuak mantendu dituzte, eta, horrez gain, langileen "polibalentzia" izan omen da zerrenda hori osatzeko beste irizpide bat.
Zuzendaritzak adierazi du 163 langileen lanpostua mantentzea "industria jarduera mantentzearen aldeko apustua" dela. Langileen ordezkariek, ordea, kaleratzeak ez dituzte ontzat eman, eta epaitegietan erregulazio espedientea inpugnatzeko aukera jarri dute mahai gainean.
Aurre konkurtso epea hilaren 30ean bukatuko da, eta, enpresak langileei adierazi dienez, bi inbertsorerekin hizketan dihardute, nahiz eta ez duten inbertsore horiek zeintzuk diren jakitera eman.