Asteburukoa atzean utzita, aurrera begira jarriak dira ibarreko Euskadiko senior mailako bi taldeak. Bada, Bilboko Jesuiten kiroldegian jokatuko dute Fagor Industrialeko mutilek, Universidad de Deusto-Loyola taldearen kontra. Zapatuan dute hitzordua, 19:30ean. Bide horretan, orain artekoari segida ematen saiatuko dira oñatiarrak; orain artean, jokaturiko bi partiduak dituzte irabazita; azkena, Limpieresol Corazonistas talde gasteiztarraren kontra: 22-19.
Arrasatearrek, berriz, domekan dute partidua, Bidasoaren aurka, 10:00etan hasita. Ford Mugarrik ere hasiera ona eman dio denboraldiari, sailkapeneko lehen postuan dira. Gaur-gaurkoz, bi garaipen eta berdinketa bakarra dute erdietsita. Azken hori, aurreko astean, Ilcapo Hondarribia taldearen aurka; partidu amaieran 25-25 adierazten zuen markagailuak.
Bestalde, Gipuzkoako Bigarren Lurraldeko Txapelketari dagokionez, Munttarpe taldearen bisita jasoko dute bergararrek.