Markel Fernandezek eta Osintxuko Txuringo Kultur Elkarteko lagunek ia dena dute gertu domekan II. Osintxuko Lasterketara begira: "Aurten, lasaiago nabil, lanak gehiago banatu ditugu eta. Iaz oso pozik geratu ginen lasterketak eman zuenarekin. Halako bat Osintxun antolatzeko gogoa nuen, mendi lasterketen bueltan zaletasun handia daukadalako, eta ilusio handiz ibili nintzen. Baina egia da lan handia dela, eta bigarren ediziorako auzotarrek eta lagunek laguntzeko erakutsi duten jarrerari esker erabaki dugu aurrera egitea".
Iazko ibilbidearekin
Bada, bigarren edizio honetan, iazko formatua erabiliko dute antolatzaileek: "Ibilbidea iazko bera izango da. Garai bateko gurdi-bideetan begira ibili gara, baina oso zikin daude eta lan galanta egin behar da horiek txukuntzen. Oraingo zirkuituak malda politak ditu, eta birritan pasatzen da auzotik, horrek ematen dion bizitasunarekin". Egunean bertan lasterketan izena emateko aukera egongo da –aurrez: Herrikrosa.eus, 10 euro–.
