Jarduera eten eta langile guztiak kanporatu osteko bigarren negoziazio batzarrean, Fagor CNAko langileek berretsi egin dute jarrera: Enplegua Erregulatzeko Espedientea aurkezteko argudioak ez dituzte onartzen eta "ekoizpenaren aldeko apustuari" eusten diote, "jarduera industriala Garagartzan mantentzea" eskatuz. Langileek adierazi dutenez, zuzendaritzak ere eutsi egin die berenei: langile guztiak kaleratzeko asmoekin aurrera jarraitzen dute.
Langileek eskatu dute "negoziaketa epea etetea". Izan ere, diote, zuzendaritzak "ez du argitu" zein izango den aurkeztuko duten proiektua, negoziaketa prozesuak zer emango duen jakin arte itxoin nahi duelako.
Egoera ekonomikoa
Langileek aditzera eman dute, bestalde, batzarrean eskatu dutela argitzeko zein den CNA Taldeko enpresen egoera ekonomikoa, "taldearen benetako egoera ekonomikoa" zein den jakin nahi dutelako.
Era berean, adierazi dute, batzarrean eskatu dutela Fagor Kooperatiba Elkarteak eta Fagor CNAk sinatutako kontratuaren kopia Fagor marka erabiltzeko.
Datorren astelehenean, irailaren 25ean, negoziatzen jarraitzeko beste batzar bat egingo dute. Bitartean, langileek adierazi dute mobilizazioekin jarraituko dutela eta iragarri dute oraingo egubakoitzean elkarretaratzea egingo dutela Arrasateko plazan, 18:30ean.
Bestalde, Edesa Industrialeko Garagartzako lantegiaren aurrealdean egurrezko gurutzeak agertu dira, Cata nos mata idatzita, beheko argazkian ikus daitekeen moduan.
