11:00etan aztertuko dute langileek Edesaren azken proposamena, batzar itxian eta ezkor

Rikardo Perez langileekin berbetan, atzo, martitzena.

Atzoko ezustekoaren ondoren, Garagartzan elkartuko dira enegarren aldiz Edesako eta Geyser-Gastecheko langileak, enpresako zuzendaritzak aurkeztutako "alternatibaren" aurrean "eman beharreko urratsak erabakitzeko asmoz". Panorama iluna dute, eta marjina txikia erabakia hartzeko, egubakoitzerako erantzuna exijitu du-eta enpresako zuzendaritzak. Gainera, oraindik ez dute abuztuko nominarik kobratu.

160 langilek lanean jarraitzea, Eskoriatzako eta Basauriko plantetan, soldata %10 jaitsita eta Garagartzako planta itxita. Eskuzabaltasun txikia erakusten duen eta lan gatazka honetan inplikatuta dauden aldeak ezustean harrapatu zituen proposamen hori da goizean Edesako eta Gesyserreko langileek aztertu beharrekoa. 

"Ez dakigu bozketarik egongo den", jakinarazi du Rikardo Perezek, Edesa Industrialeko langileen batzordeko presidenteak. Beraz, batzarretik proposamenaren gaineko edo bestelako erabakiren bat aterako den edo ez ere, ezin jakin, une honetan. 

Baldintza: egubakoitzerako erabakia

Barikurako dute, edozein modutan, jarrita epe-muga langileek. Horixe izan da-eta, Edesa Industrialeko zuzendaritzak atzo aurkeztutako proposamenari ipinitako baldintzetako bat. Hori bete ezean, enplegua suntsitzeko espedientea abiarazi behar duela jakinarazi zuen zuzendaritak, lan-talde osoarendako; hau da, 327 langilerendako.

Eta edozein modutan, baldintza hori beteta ere, azken berba langileek izango dutela ere ezin esan; enpresako zuzendaritzak mahai-gaineratutako bigarren baldintza izan delako balizko inbertsoreak duela azken hitza, proposamen berria onartzen duen edo ez esateko.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.