Ligako azken jardunaldira arte eutsiko dio Kanpanzar Arrasatek emozioari, nahiz eta matematikak aldeko dituzten ARTko ordezkariak oraindik ez direlako ligako txapeldun. Duela hamabost egun bigarren sailkatu Zaisa Txingudiri partidu garrantzitsua irabazi ostean (25-20), zuri-moreek ezin dute asteburuan kalerik egin (Zapatua, 17:00, Mungia). Liga txapelketa lortzeko biderik errezena da bihar Uribealdeari irabaztea, baina partidua galduta ere posible da txapela Arrasatera berdin-berdin ekartzea, baldin eta Txingudik punturik batzen ez badu: "Irundarrek euren partidua galduko balute, automatikoki txapeldun izango litzateke Arrasate, Mungiatik esku-hutsik bueltatu arren", adierazi dute klubetik.
Autobusa zaleendako
Klubak doako autobusa jarriko du zaleendako –15:30ean Garibaiko geltokia–. Interesatuek aldez aurretik eman behar dute izena, info@arrasaterugby.eu edota Whatsapp bidez, 696 334 912 telefono zenbakian.
