Debagoieneko udalek haur, nerabe eta gazteei zuzendutako egitarau bereziak prestatu dituzte datozen oporretarako. Helburua, antolatzaileen esanetan, "opor egunetan ere aisialdia modu aberasgarrian igarotzeko aukera eskaintzea" da. Apirilaren 1etik 23ra bitartean denetariko ekintzak izango dira: irteerak, tailerrak, txapelketak...
Arrasate
Arrasaten bi egitarau prestatu dituzte, bata ludotekak eta bestea gazte txokoak. Lehenengoen kasuan, nabarmentzekoa da apirilaren 19tik 21era Oriora egingo duten irteera, 10-12 urtekoendako –izen ematea itxita–. Arrasaten geratzen direnendako ere izango dira ekintzak.
Erdiguneko gazte txokoa egunero egongo da zabalik (17:00-21:00), eta hainbat ekintza izango dira: Vince Pong, Kurtzetxikira, Umore horiya...
Bergara
Bergaran ere gaztetxoek izango dute zer egin apirilaren 10etik 22ra. Nabarmentzekoa da azken egunean kart autoetan ibiltzeko egingo duten irteera.
Oñati
Oñatin ere egitarau mardula prestatu dute. Bihar, apirilak 1, kuboko ping-pong txapelketa izango da, eta hilaren 7tik aurrera ia egunero denetariko ekintzak izango dira, ludotekan zein gaztelekuan: antzerkia, Oñati Cup, antzinako jolasak...
Aretxabaleta-Eskoriatza
Aretxabaletako eta Eskoriatzako gazte txokoek egitarau bateratua prestatu dute, eta, urtero legez, Gaztekonkis egingo dute.
Haurrei dagokienez, sukaldaritza, eskulanak, birziklapena... mota askotariko jarduerak bilduko dituzten egitasmoak egingo dituzte herri bietan. Plazaren bat edo beste badago oraindik.