"Iruzurraren aurka eraginkorrago" izateko "zenbait isun gogortuko" dituela iragarri du Aldundiak

Gipuzkoako Foru Aldundiak Zerga Arau Orokorra berrituko du. Horren helburuak bi direla iragarri du: Estatuan eta nazioartean egin diren azken aldaketa juridikoetara egokitzea eta foru araudi orokorreko zenbait atal eguneratzea. "Zerga iruzurrari aurre egiteko neurri zehatzak" ere zehaztu dituzte, zenbait isun gogortuta.

Jabier Larrañaga Ogasun eta Finantza diputatuak eman du horren berri Batzar Nagusietako Ogasun eta Finantza batzordean. "Erreforma teknikoa" dela adierazi du, eta azpimarratu gura izan du "zerga iruzurraren aurkako borroka lehentasunen artean dutela".

Hainbat zerga zigor "gogortzea" aurreikusi dute "eraginkortasuna irabazteko" helburuarekin: "Kontabilitatea ezabatu, manipulatu edo suntsitzen dutenen kontrako zigorrak gogortzen dira, bai eta erabilera bikoitzeko software-aren aurkakoak ere", adierazi du diputatuak. Profesional edota enpresen kontabilitatearen manipulazioak negozio zifraren %20ko isuna izango du, 30.000 euroko gutxiengoarekin. Jarduera bakar baten kontabilitate ezberdinak daramatzatenen kontrako zigorrak 30.000 eurotara igotzen dira, Larrañagak azaldu duenez. Faktura ez ematea, bestalde, 1.000 euroko isunarekin zigortuko da, ematen ez den aldi bakoitzeko. Ekintza hauek iruzurraren aurkako "estrategia integral" baten barruan kokatu ditu Aldundiak.

 

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.