'Hemen Debagoiena': programa berria gaurtik Goiena Telebistan

Gertuko informazioa formatu arinean emango duen Hemen Debagoiena saioa estreinatuko du gaur, otsailak 20, Goiena Telebistak. Ahots eta pieza askorekin osatutako saioa izango da, Gaurkoak albistegia, esaterako. Astelehenetik egubakoitzera bitartean emango dute (18:00, 20:00 eta 22:00).

Berritutako programazioarekin dator Goiena Telebista. Gaurkoak albistegiak Berriak ordezkatuko du; bertako albisteak jasoko dituzte saioan eta 14:30ean eman, orain arte lez.

Hemen Debagoiena, ostera, Debagoiena Zuzenean saioaren ordez dator (18:00etan, 20:00etan eta 22:00etan). Ordubetean eta formatu arinean Debagoienean sortutako kontuak jasoko dituzte, besteak beste, izango dira erreportajeak, elkarrizketak, Gaurkoak saioko albisteak, Interneteko kontuak eta Goiena Aldizkaria eta Puntua aldizkarietako berriak.

Kirola, musika eta elkarrizketak

Programazioa osatuko dute beste hainbat saiok. Hona hemen egunero izango direnak:

  • Astelehenetan: Harmailatik kirol saioa.
  • Martitzenetan (martxoaren 8an hasita): Harira, elkarrizketa saioa.
  • Eguaztenetan: Galde Gazte, gazteek egindako elkarrizketa saioa. Lehenengo gonbidatua Txerra Bolinaga musikaria izango da.
  • Eguenetan: Kulturrizketak, kultur arloko ekoizleen arteko elkarrizketa saioa. Alex Sardui eta Izaro musikarien arteko elkarrizketa jaso dute lehenengoan.
  • Egubakoitzetan: Amaia DJ, musikaren gaineko saioa.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.