Arrasateko Emakumeen Mundu Martxako Plataformaren elkartaratze deialdia
Arrasateko Emakumeen Mundu Martxako Plataformak elkartaratzerako deialdiarekin batera, honakoa gogorarazi nahi izan die herritarrei: "Pasa den astean, gizon batek ama erail zuen Portugaleten, asteburuan beste batek bi urtetako alaba zauritu zuen, eta duela bi egun jakin dugu hirugarren batek emakume bat erail duela Iruñean". Gertaera hauen aurrean "erabateko gaitzespena" adierazi nahi izan du Plataformak eta deia egin die herritar guztiei, bihar, eguaztena, arratsaldeko 19:00etan, Arrasateko Herriko Plazan izango den elkarretaratzean beraien gaitzespena ere adieraz dezaten.
Honekin batera, Plataformak nabarmendu nahi izan du, indarkeria matxista errotik desagerrarazi nahi badugu "ezinbestekoa" dela "herritarron zein erakunde publikoen erabateko erantzukizun eta inplikazioa". Era berean, komunikabideetara bidalitako oharraren bidez, "eraildako emakumeen senitarteko eta lagunei, zein asteburuan erasotutako haurrari erabateko babes eta elkartasuna" iritsarazi nahi izan diete.
Bergarako Martxanteren elkartaratze deialdia
Bergaran, elkartaratzea eguazteneko 19:00etarako deitu da, herriko plazan.
Oñatiko Sare Feministaren elkartaratze deialdia
Oñatin, eguazteneko 18:30ean izango da bilkura, Foruen plazako kiosko parean. Oñatiko udalak ere bat egin du deialdi honekin.
