Gabonak kirol hitzorduz beteta daude, eta horietako batzuk gazteenei zuzendutakoak izango dira. Hala, Mondrak abenduaren 31n antolatuko du Txelis-en omenezko futbol torneoa, eta Gipuzkoako eta Bizkaiko 16 talde batuko dira, infantil mailakoak: "Guztira 250 jokalari inguru batuko dira Mojategin. 09:30ean hasiko ditugu partiduak, eta eguerdian amaituko da torneoa, egun horretan arratsaldea ezin dugulako luzatu", adierazi du Ramon Azkaratek.
Bixente Etxeandia, lau egunez
UDAk, berriz, gaztetxoagoak batuko ditu abenduaren 26tik 29ra bitartean egingo duen torneoan, Ibarran. Gipuzkoako Futbol eskoletako hainbat taldetako ordezkariak lehiatuko dira: Aloña Mendi, Mondra, Bergara eta Eibar.
Hala, abenduaren 26an hasiko dute txapelketa –partidu guztiak arratsaldez izango dira–. Eta, faseak gainditu ostean hilaren 29an jokatuko dituzte finalak.