BIC Gipuzkoak 57 ekintzailetza egitasmo eta 27 start-up babestu ditu aurten

BIC Gipuzkoak, lurraldeko Business Innovation Center-ek, 2016ko balantzea egin du, gaur Donostian eskainitako prentsaurrekoan. Aurten 57 ekintzailetza egitasmo lagundu dituzte eta berrikuntza nahiz teknologia osagarri duten 27 start-up abiarazi dituzte. BIC Gipuzkoak ordezkaritza dauka Arrasaten ere.

BIC Gipuzkoako zuzendari orokorrak, Marisa Arriolak, balantze hau aurkeztu du Ekonomia Sustapena, Landa Ingurunea eta Lurralde Orekako diputatu Ainhoa Aizpururekin eta Eusko Jaurlaritzako Ekintzailetza, Berrikuntza eta Informazio Gizarteko zuzendari Aitor Urzelairekin batera.

2016ri dagokionez, emandako datuen arabera, lurraldeko ekintzaileek aurkeztutako 208 egitasmo babestu dira. Horietatik 35ek enpresa proiektu berrientzako Ekintzaile-Txekintek programaren babesa jaso dute eta beste 22k enpresen baitan ekintzailetza bultzatzeko Barnetekin-Ekintzaile programarena. Urte honetan zehar emandako laguntzen kopurua 1.274.550 eurora iritsi da. Gainera, Bic Gipuzkoak 27 Start Up sustatu ditu, guztiak honako sektoreetan kokatzen direnak: biozientziak (%40), fabrikazio aurreratua (%34), ingeniaritzak eta teknologia digitalak (%19) eta energia (%7).

Azken hamarkadan, 300 enpresa-proiektu

Azken hamarkadan zehar eskainitako datu positiboak ezagutzera emateko ere balio izan du gaurko aurkezpenak. Ekintzaile-Txekintek programak 2003 eta 2016 arten bultzatu ditu 302 enpresa proiektu berri; horietatik %68,8 bideragarriak direla ikusi da eta beraz, enpresa bat abiarazteko aukera eskaini dute. Bestalde, Barnetekin-Ekintzaile programak 2005etik hona sustatu ditu 194 barne-ekintzailetza proiektu, eta horietatik %70,1 izan dira bideragarri; azken horien %57,3tan enpresa berria sorrarazi dute eta %42,7tan enpresen aktibitatea dibertsifikatzeko aukera hobetsi dute.

Bi programa horiei dagokienez, merkatura irtendako hamar proiektutik zortzik oraindik ere zabalik eta lanean dihardute gaur egun ere.

Helburua, berrikuntzan oinarritutako enpresak abiaraztea

BIC Gipuzkoa lurraldeko Business Innovation Center-a da eta ekintzaileei behar duten babes osoa eskaintzen die enpresa berria sortzeko prozesuan, aholkularitza eskainiz prozesu horretan berrikuntzan oinarritutako enpresa egitasmoetan.

Euskadiko BIC sareko kide da BIC Gipuzkoa, BIC Araba, BIC Bizkaia eta BIC Bizkaria Ezkerraldearekin batera, eta errazte funtzioa betetzen du enpresa berritzaile berriak sortzeko prozesuan eta eragile aktibo ere bada Gipuzkoako kultura ekintzailean laguntza eta sustatzeko garaian. 1993an sortu zenetik, herrialde garapenerako motor garrantzitsuenetakoa bilakatu da, inguruko enpresa eta ekintzaile berrien behar zehatzak aurreikusi, egokitu eta asetzeko ahalmen nahikoarekin, Gipuzkoako berrikuntza, prestakuntza eta enpresa jarduera sustatuz eta elkarlan estua gauzatuz Teknologia-Zentro, Erakunde Publiko eta Pribatu eta Unibertsitateekin.

BIC Gipuzkoaren Arrasateko ordezkaritza Garaia Berrikuntza Gunean dago.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.