“Antzuola-Bergara legealdi honetako proiektu estrategiko bat da eta Gipuzkoako biribilgunea amaitzeko falta den zati horren eraikuntza lanak, aurreikusita zeuden modura, 2017ko urtarrilean hasiko dira”, azpimarratu du Oiarbidek. “Horiek izango dira departamentu honek datorren urterako jarri dituen erronka nagusienak: Antzuola-Bergara errepidea eta Gipuzkoako errepide sarea egoera hoberenean mantentzea”, gehitu du.
Hala ere, errepideen artapenak eramango du departamentuko aurrekontuaren zati nagusia eta 58.570.068 € bideratuko dira errepideen mantenura. Diputatuak adierazi duenez, “garrantzi berezia” eta “lehentasuna” emango zaio errepideen artapenari eta zaintzari.
2016an sortu zen presako inbertsioak, prebentzioa eta konponketak egiteko programak %20,78ko igoera izan du eta, datorren urtean, 13.550.449 € izango ditu zoruen birgaipenerako, lauguneen hobekuntzarako edo zarataren kontrako jardueretarako. Besteak beste, programa honen bidez, Beasain eta Ordizian pantaila akustikoak jartzea dago aurreikusita.
Aipagarria da, baita ere, eraginkortasun energetikoan inbertsioak egiten jarraituko duela Bide Azpiegituretako Departamentuak, eta 2017an 2,5 milioi euro bideratuko ditu N-1eko Tolosa-Lasarte artean argiteria eta kableatuak aldatu eta egokitzen.
Beste bi ekintza Debagoienean
Errepideen eraikuntza eta hobekuntzekin ere jarraituko du Bide Azpiegituretako Departamentuak eta datorren urterako Soraluzeko, Arrasateko (Lana), Aretxabaletako eta Amuteko biribilguneak egitea aurreikusten da. Horrez gain, Deba-Mutriku proiektua idazten amaitzea eta Azkoitia-Urretxu proiektuaren aurreneko fasea idazten hastea ere jasoko dira 2017ko Bide Azpiegituretako Departamentuaren aurrekontuetan.