Anna Gabriel elkarrizketatuko du Onintza Enbeitak, 'Emakumeak Protagonista' zikloaren barruan

Arrasateko Emakume Txokoak beste elkarrizketa saio bat antolatu du Emakumeak Protagonista ekimenaren barruan. Oraingoan, Anna Gabriel CUP alderdi politikoko kidea eta Kataluniako parlamentaria elkarrizketatuko du Onintza Enbeita bertsolari eta EH Bilduren parlamentari izandakoak. Barikuan, hilaren 28an, Kulturateko areto nagusian izango da, 19:00etan hasita.

Arrasateko Emakumeen Txokotik adierazi dute elkarrizketa saio hauen helburua dela emakumeak jartzea "oholtzan, erdigunean, eremu publikoan, herrigintzako eremu ezberdinetan, egiten duten ekarpena aitortzeko eta ikustarazteko". Hala, hainbat esparrutan "mugitu diren eta mugitzen dien" emakumeak, protagonista bilakatzea da antolatzaileen asmoa.

Horretarako, elkarrizketa formatua aukeratu dute, emakume horiek beren "esperientziaren, ibilbidearen, zailtasunen, ikaspenen, hausnarketen"… berri emateko, "konfiantzazko eta gertutasunezko" giro batean.

Oraingoan, Onintza Enbeitak Anna Gabriel elkarrizketatuko du eta bien arteko elkarrizketa horren bidez emakumeen parte hartze sozial eta politikoaren gaian sakondu nahi da, antolatzaileek diotenez.

"Emakumeak politikagintzan agenda eta eztabaida feminista sartzen dutenean, kuestionatuak eta irainduak izaten dira eta jendarte patriarkalaren benetako irudia erakusten digu horrek. Horrek ze prezio dakarren emakume horiengan, nola bizi duten, ze hausnarketa egiten duten plazaratu nahi dugu saio honekin eta Onintza Enbeitak ere bizipen horiek izan dituenez, elkarrizketa interesgarria izan daitekeela pentsatzen dugu" adierazi dute Emakume Txokotik.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.