Bailarako bost ikastetxe omendu ditu Foru Aldundiak zergen gaineko hezkuntza programa baten parte hartzeagatik

Leire Kortabarria 2016ko urr. 4a, 17:48
Ikastetxe omenduak; tartean, Debagoienekoak.

Debagoieneko ikastetxe batzuek –Arrasateko batek, Oñatiko bik eta Bergarako bik– omenaldia jaso dute gaur, martitzena, Foru Aldundiaren eskutik, diputatu nagusi Markel Olano ere bertan zela. Gipuzkoako ikastetxeekin topaketa egin du Olanok, eta Foru Aldundiak haietako 10 omendu ditu, Ekonomia eta Zergak foru proiektuan hasieratik parte hartzeagatik.

Omenduak honako hauek izan dira: Arrasate Institutua; Oñatiko Elkar Hezi Ikastetxea; Bergarako Mariaren Lagundia Ikastola; Oñatiko Txantxiku Ikastola; Bergarako Aranzadi Ikastola; Beasain Institutua; Oiartzungo Haurtzaro Ikastola; Azpeitiko Iraurgi Ikastetxea; Zarauzko Lizardi Institutua; eta Lazkaoko San Benito Ikastola. Foru arduradunek diploma bana eman eta euren esker ona adierazi diete egun arte erakutsi duten inplikazioagatik. “Zuek gabe hau ez litzateke posible izango”, esan dute.

Gipuzkoako diputatu nagusiak, Markel Olanok, gizarte kontzientziazioan jarri du azpimarra, zerga iruzurrari aurre egiteko erarik eraginkorrena dela defendatuz. “Iruzur egiten duenak zerbitzu publikoen finantzaketa higatzen du, eta honek guztioi egiten digu kalte”, adierazi du diputatu nagusiak, esparru hau Aldundiarentzako “estrategikoa” dela gogoratuz. Zentzu honetan, hezkuntzaren garrantzia nabarmendu du, foru erakundeak ikastetxeekin egiten duen lankidetza balioan jarriz: “Biharko herritarrak kontu honen garrantziaz jabetzen badira, guztion laguntzarekin eta guztion mesedetan Gipuzkoa askoz eraginkorragoa izango da etorkizunean zerga iruzurraren aurkako jarduketan”.   

Olanok ikastetxeekin eginiko topaketan egin ditu adierazpen hauek.

Zerga sistema DBHra eta Batxilergora eroatea

Ogasun eta Finantza departamentuak bultzatzen duen Ekonomia eta Zergak proiektua 20 orduko unitate didaktikoan datza, eta zerga sistema eta sektore publikoaren oinarrizko ezagutza 4. DBHko eta Batxilergoko ikasgeletara eramatea du jomuga.

Ogasun eta Finantza diputatuak, Jabier Larrañagak, ireki du ekitaldia, eta ikastetxe elkartetako ordezkariek ere hartu dute hitza: Koldo Tellitu, Ikastolen Elkarteko lehendakaria; Igone Azpiroz, Lizardi Institutuko lehendakaria eta BIHEko ordezkaria; eta Arantxi Urretavizcaya, Kristau Eskolako Pedagogia arduraduna. Alde guztiek adierazi dute elkarlanarekin jarraitzeko asmoa.

Diputatu nagusiak, bere hitzaldian, legealdi hasieratik errepikatu duen ideia mahai gaineratu du: Gipuzkoa Europa mailan gizarte ezberdintasun gutxieneko lurraldeen artean kokatzea nahia.  

Aurten 30 ikastetxek parte har dezaten nahi dute

Larrañaga diputatuak, bere aldetik, proiektutik 1.000 ikasletik gora pasa direla balioztatu du eta, balio kuantitatiboa baino, balio kualitatiboa nabarmendu nahi izan du.

Aurrera begira, Foru Aldundiak eta Ogasunak “anbizioz” jokatuko dutela adierazi du, helburua unitate didaktikoa Gipuzkoako ikastetxe guztietara hedatzea delarik. “12 ikastetxek hartu zuten parte aurreko ikasturtean, eta aurten 30 izatea espero dugu. Datorren urtean 60, eta legealdi bukaerarako, 90 ikastetxetara iristen saiatuko gara”, azaldu du.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak