UDAk ezin izan du liga hobeto hasi, lau partiduetatik lau garaipen. Bigarrena da sailkapenean, Anaitasunarekin berdinduta. Aloña Mendik, aldiz, berandu baino lehen buelta eman beharko dio egoerarik ez badu Erregional Preferentera ez jaisteko sufritzen ibili.
Aloña Mendiko jokalari Gorka Irizarrek onartu du UDA gehiago izan dela: "Badakigu UDA oso talde indartsua dela, eta saiatu gara gauzak zail jartzen. Baina ez da posible izan, gehiago izan dira. Atzean sartu gaituzte eta ezin dugu aurrera egin. Emaitza justua izan da. Liga hasiera ez da ona izan; goialdean egongo diren taldeak tokatu zaizkigu... Hurrengo astetik aurrera irabaztera irten beharra dugu".
Bestalde, derbian bigarren gola egin duen Julen Zaitegi aurrelari arrasatearrak nabarmendu du taldearen lana: "Bagenekien Aloña Mendi itxarotera etorriko zela eta eskerrak gola goiz sortu dugula. Egia esan, uste nuen bigarren zatian erasora jo eta gehiago irekiko zirela baina nahiko itxita jarraitu dute. Ez dugu aukera larregi sortu baina eurak apenas hurbildu dira gure atera. Nahiko eroso egongo gara, eta emaitzarekin pozik gaude".