Goi-ikasketa bako gazteak laneratzeko egitasmoa jarriko du abian Mankomunitateak

Goi-mailako ikasketa bako gazteei lan-munduan sartzeko aukera eman nahi die Debagoieneko Mankomunitateko Garapen Agentziak. Horretarako, Txertatu Merkatuan egitasmoa jarri du abian. Eguenean, hilak 22, interesa duten guztiendako saio informatiboa emango du.

Gazte Enplegurako 2014-2020 Programa Operatiboaren bitartez jarri da abian Txertatu Merkatuan proiektua; hain zuzen, horren funtsen %91,89 Europako Batasunak ipini du. Helburua da 16 eta 30 urte arteko gazte langabeak lan-merkatura sartzen laguntzea. Horretarako, norberaren premiei erantzuten saiatuko dira, gizarteratzea eta laneratzea bultzatuz. Euskadi osoan, 500 gaztek parte hartu ahal izango dute.

Txertatu Merkatuan programaren berezitasuna da hasiera-hasieratik parte-hartzaile bakoitzaren egoera kontuan hartuko duela, haren zailtasunak gainditzen eta hobetzen laguntzeko.

Lau hilabeteko prestakuntza

Parte hartzeko, honako baldintzak bete behar dira:

  • 16 eta 30 urte artekoa izatea
  • Debagoienean erroldatuta izatea
  • Ikasketarik gabea izatea; edo lehen mailako ikasketekin; edo bigarren mailako ikasketekin; edo Lanbide Heziketa, bukatuta edo bukatu gabe; edo erdi-mailako heziketa zikloa, bukatuta edo bukatu gabe; edo unibertsitateko ikasketak bukatu gabe
  • Langabea izatea
  • Prestakuntzarik jasotzen ez egotea


Lau hilabeteko ibilbidea jarraituko dute parte-hartzaileek urritik 2017ko urtarrilera arte. Talde-saioak, laneratze tailerrak, saio indibidualak, prestakuntza tekniko saioak eta praktikak egingo dituzte.

Nondik norako guztiak azalduko dituzte arduradunek eguenean, hilak 22, Mankomunitatean (Arrasateko Nafarroa Etorbidean), 11:00etan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.