Bai merkatariendako bai herritarrendako, aukera polita dira Merkemerkaua eta Ixadebalde egunak: bezeroendako, ohiko produktuak prezio berezietan eskuratzeko, eta merkatariendako, udaberri-uda denboraldia itxi eta stock-a kentzeko.
Arrasaten, kalean egitea erabaki dute merkatariek; denden kanpoaldean ipini dute generoa. Karpak ipini dituzte babes gisa.
Aretxabaletan, berriz, pilotalekuan egiten dabiltza Ixadebalde azoka. Aretxarteko presidente Idoia Elexpuruk honako hau dio: "Desberdina da kalean egin edo frontoian egin. Dena dela, barruan oso polita geratu da dena muntatuta. Eguerdi partean jendea hurbildu da, eta gero, arratsaldeko lehen zatia lasai joan da eta, 18:00ak eta 20:00ak artean, beste une jendetsu bat izaten da".
Giroa animatu dute ere umeendako puzgarriak eta Arrasatetik ekarritako globoflexia tailerrak.
Tabernarekin, 13 izan dira merkatarien salmenta postuak, eta UDA eta Kurtzebarri Eskola ere bertan izan dira bakoitza bere postuarekin.