Auzitegi Nazionalaren iritzia eta PPk eta Ciudadanosek Arnaldo Otegiren hautagaitzaren kontra aurkeztutako alegazioak aintzat hartu ditu Hauteskunde Batzordeak eta ez, ordea, Iñigo Iruin EH Bilduren defentsako abokatuak auzi honetan, egubakoitzean aurkeztu zuen helegitea Otegi hautagai izan zedin. Iruinen arabera, martxoan -Otegik kartzela zigorra osorik bete zuenean- "amaitu zen sufragio pasiborako inhabilitazioa".
Hauteskunde Batzordearen ustetan, Otegik 2021. urtera arte hauteskundeetan hautatua izateko debekua ezarria du Bateragune auzia dela eta.
Orain, eguenerako, irailaren 1erako, Donostiako epaitegietara iritsiko litzateke auzia, eta zapaturako, irailaren 3rako, erabaki beharko luke epaileak.
Behin bide hori ere agortuta, Otegiren hautagaitzaren inguruko azken erabakia Auzitegi Konstituzionalak hartu beharko luke. Irailaren 5era arte dago bertara babes bila jotzeko epea, eta irailaren 9rako, hauteskunde-kanpaina hasten den unerako, jakin beharko da Otegi Legebiltzarrerako zerrendetan egongo den ala ez.
15.000 sinaduratik gora Otegik parte hartzearen alde
Bestalde, hainbat pertsona ezagunek bultzatutako kanpainak Arnaldo Otegik aukera izan dezan hauteskundeetan aukeratua izateko, 15.000 sinadura lortu ditu dagoeneko. Joan zen barikuan aurkeztu zuten manifestua Otegiren alde.
