Lehendakariak dolumina adierazi dio Frantziako Herriari Nizako atentatuaren ostean

Iñigo Urkullu lehendakariak gogoan izan ditu atzo Nizako atentatuan hildako eta zauritutako guztiak. Era berean, doluminak eta elkartasuna adierazi die Frantziako herritarrei. Era berean, minutu bateko isilunea eskatu du. Adierazpen horiek Debagoienean egin ditu, ospitalera egindako bisita baten. Ibarreko hainbat udaletxe aurrealdeetan ere, tartean Arrasaten, elkarretaratzeak egin dituzte eta Jaurlaritzak eta Diputazioak deituta ere bai, Gasteizen eta Donostian.

"Eudelek gaitzespen irmoa adierazi nahi du, bart Nizan gertatu, hildako asko eta zauritu ugari eragin dituen atentatuaren aurrean. Erabateko irmotasunez gaitzetsi du indarkeria terroristaren basakeria, eta dolumina eta elkartasuna helarazi nahi die biktimen senide eta hurbilekoei. Une latz honetan, Euskadiko Udalok besarkada solidarioena eta hurbiltasun-sentipen sakonena bidali nahi dizkiegu Nizako hiriari eta Frantziako herri osoari", adierazi dute.

Gipuzkoako Diputaziotik ere, Foru Aldundiaren aurrean, 12:00etan, atentatu terrorista gaitzesteko elkarretaratze isila deitu dute. Bertan parte hartuko dute Aldundiko ordezkariek eta langileek, eta herritarrei parte hartzeko deia luzatu zaie.

Bergarako Udala:

"Bart gauean Nizan izandako atentatua gaitzesteko elkarretaratzeak deitu dituzte Eudelek, Eusko Jaurlaritzak eta Gipuzkoako Aldundiak. Elkarretaratzeak gaur, ostirala, egingo dira 12:00etan udaletxeen aurrean eta Bergarako Udalak bat egin du, horregatik bergararrei bertan parte hartzeko deia luzatzen zaie", adierazi dute Bergarako Udaletik

Eskoriatzako Udala:

"Eskoriatzako Udalak Nizako atentatua dela eta Eudelek egindako gaitzespenarekin bat egin du eta gaur, uztailak 15, eguerdiko 12:00etan udaletxe aurrean 5 minutuko elkarretaratze isila egiteko deia egiten du"

Arrasateko Udala:

"Udalak gaitzespen irmoa adierazi nahi du, bart Nizan gertatu, hildako asko eta zauritu ugari eragin dituen atentatuaren aurrean. Udalak erabateko irmotasunez gaitzetsi du indarkeria terroristaren basakeria, eta dolumina eta elkartasuna helarazi nahi die biktimen senide eta hurbilekoei. Eudelen adierazpenekin bat eginik, une latz honetan, Euskadiko Udalok besarkada solidarioena eta hurbiltasun-sentipen sakonena bidali nahi dizkiegu Nizako hiriari eta Frantziako herri osoari".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.