Jardunaldiak topaketa egitura izan zuen; bereziki, gazteekin –ekintzaileak, negozio berriak martxan jarri nahi dituztenak edo ideiak dituztenak– topaketa egin zuten Mondragoneko ordezkariek, korporazioak etorkizunean garrantzia izango duten sektore berrietan egongo dela eta horko aukera berrien aldeko apustua egiten dabilela adierazteko.
Sektore horien artean daude smart city izenekoak (hiri inteligenteak; Coronación auzoan egingo den lana irizpide horien araberakoa izango da) eta fabrikazio aurreratua, eta bi horiek landu zituzten topaketetan.
Korporazioko zortzi ordezkari
Goizeko topaketan, lehenengo, Mondragon Korporazioko lau kidek hitz egin zuten: Lander Jimenez (LKS Ingeniaritza), David Sanchez Bote (MIK), Jesus Hernandez (Fagor Ederlan) eta Oscar Berreteaga (Umla Embedded Solutions); arratsaldekoan, honako beste lau ordezkariek hartu zuten parte: Iraia Elgezua (Batz), Carlos Garcia (Mondragon Goi Eskola Politeknikoa), Peter Craamer (MSI) eta Nerea Aranguren (DanobatGroup).
Mondragon Korporazioaren esanetan, helburu nagusia zen erakustea Mondragoneko kooperatibek herriarekiko duten "konpromisoa", baita, kasu honetan moduan, gero eta jakin-min handiagoa eta aukera gehiago pizten dabiltzan esparru berrietan ere, eta haiek bultzatzen edo haietan ekiten dabiltzan gazte eta ekintzaileekin. Topaketetara jende asko joan zen.