Gipuzkoa Industria 4.0: Produktuen eta zerbitzuen garapena izeneko programa berria 700.000 euroko diru poltsarekin dago hornituta. Fabrikazio aurreratura eta industria 4.0ra bideratutako produktu, teknologia edo aplikazio berrien garapenera zuzendutako egitasmoa da. Proiektuek laguntza jaso dezaten 30.000 euroko aurrekontua izan behar dute, eta oinarri zientifiko eta teknologikoko enpresa berrien kasuan, 15.000 eurokoa.
Aizpuruk azaldu duenez, besteak beste, ondorengo proiektuek laguntza jasotzeko aukera izango dute: ekoizpen prozesuaren kudeaketa eta kontrola, industria 4.0 produktuak, konektibitatea eta mugikortasuna, zibersegurtasuna, Big Data, Robotika aurreratua, Fabrikazio gehigarria eta 3D inprimaketa, Prozesu eta produktu trazaduren teknologiak, eta Sistema adimentsuak.
ETEek, lehentasuna
Lurraldeko enpresen nazioartekotzea sustatzeko Internazionalizazio Programa abian jartzea ere erabaki du Aldundiak, Eusko Jaurlaritzarekin eta Bazkundearekin elkarlanean, 1.300.000 euroko aurrekontuarekin. Bi laguntza lerro izango ditu: bat, Inter-Ezarpen izenekoa, Europako Batasunetik kanpo produkzio-ezarpenak egiteko eta komertzialei laguntzeko. Enpresa txiki eta ertainek izango dute lehentasuna, eta gehienez 100.000 euroko laguntza emango da proiektuko. Bestetik, Inter-Produktu izeneko programa, EBtik kanpo produktu berriak merkaturatzeko dago diseinatuta. Honetan ere enpresa ertain eta txikiek izango dute lehentasuna eta proiektu bakoitzeko gehienez 75.000 euro jaso dezaketela jakinarazi du Aizpuruk.