Untzillako eta Kruzetako gainak gaur, martitzena, Euskal Herriko Itzulian

Luis Leon Sanchez (Astana) eta Dani Navarro (Cofidis) lehen etapako esprintean.

Bigarren etapa jokatuko da gaur, eta hainbat kilometro egingo ditu Debagoienean. Markina-Xemeindik irten eta Baranbio-Garrastatxun amaituko da (Amurrio); 174,3 kilometro izango ditu.

Bergara aldetik (Osintxu) sartuko dira ziklistak Debagoienean (13:15); gero, Elorregitik Arrasateko saihesbidera joko dute, eta Aretxabaletara sartuko dira. Han hasiko dituzte Untzillako maldak; 13:45 aldera izango dira gainean. Hura jaitsi ostean, Aramaiorantz hartuko dute, eta Kruzetako gaina pasatuko dute 14:00etan. Handik helmugara 118 kilometro geratuko zaizkie.

Atzo, astelehena, Astana taldeko Luis Leon Sanchez murtziarrak irabazi zuen lehen etapa, Markina-Xemeinen. Faborito guztiak sartu ziren denbora berean; izan ere, luzea da faboritoen zerrenda: Contador, Quintana, Pinot, Aru, Sergio Henao, Joaquim Rodriguez, Simon Yates, Spilak, Mollema... Goi mailako izenak, goi mailako ibilbidean egurra emateko gertu.

Bosgarren etapan ere pasatuko da Itzulia ibarretik, egubakoitzean; eta zapatuan amaituko da, 16,5 kilometroko erlojupekoarekin, Eibarren.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.