Enpresak bide elektronikoz bakarrik erlazionatuko dira Gipuzkoako foru Ogasunaren apirilaren 1etik aurrera

Pertsona juridiko gehienek, enpresak gehienek tarteko, Gipuzkoako Foru Aldundiko Ogasun eta Finantza departamentuarekin duten harremana bide elektronikoz egin beharko dute datorren egubakoitzetik aurrera, apirilak 1. 

Arauketak Identifikazio Fiskaleko Zenbakiaren hasierako letra A, B, C, D, F, P, Q, S, U edo V duten entitateak hartzen ditu barne, eta baita establezimendu iraunkorra duten ez-egoiliarrak eta zerga kudeaketako profesional gisa aitortuta dauden pertsonak ere.
    
Erabakia 1/2016 Foru Aginduan dago jasota eta, Ogasun eta Finantza foru diputatuak, Jabier Larrañagak, azpimarratu duenez, sistema berriak hainbat abantaila ekarriko ditu. “Batez ere, irisgarritasuna eta segurtasuna hobetuko dira Ogasunaren eta pertsona juridikoen arteko erlazioan: Internetera konexioa dagoen edozein leku izan daiteke sarbide, eta egoitza elektronikoa 24 ordu eta 365 egunetan dago martxan”, nabarmendu du.

Gainera, administrazio prozesuen epeak murriztuko dituela eta erakunde publikoari kostuak aurreztea ere ekarriko du harreman-eredu berriak. “Segurtasun juridikoa eta eraginkortasuna hobeto bermatzen ditu datorren asteko ostiraletik aurrera indarrean egongo den sistemak”, adierazi du.

Eragiten die 30.000 pertsona eta entitateri

Neurri honekin, aipatutako eragileak harremanak bide elektronikoz izatera behartuta egongo dira, bai zerga aitorpenak edo idatziak aurkezteko, erreklamazio ekonomiko-administratiboak barne, zein jakinarazpen elektronikoak jasotzeko, arrazoi teknikoak direla eta bidalketa telematikoa ezinezkoa den kasuetan izan ezik. Horretarako sinadura elektroniko propioa beharrezkoa izango da (IZENPE, Camerfirma, FNMT edota Foru Aldundiko pasahitz operatiboa), edota sinadura elektronikoa duen ordezkari baten bitartez jardutea.

Baldintza hauek betetzeko, departamentuak interesatuen eskura jarri ditu beharrezko informazio eta baliabideak. Gainera, neurri honek eragingo dituen 30.000 pertsona eta entitateri prozesuari buruzko mezu informatiboak bidali dizkie.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.