MUk Venta de Bañosen aurka lortutako garaipenak bikoitza balio du

Garaipen garrantzitsua lortu du MUk Venta de Bañosen aurka, EBA mailan. Partidua irabazteaz gain –73-63– tantoetan ere abantaila hartu dio Venta de Bañosi. Han zortzi tantogatik galdu zuten arrasatearrek; hemen hamarreko aldearekin irabazi dute. Josu Larreategi pozik azaldu da, "garaipen bikoitza" izan delako. Bestalde, Natra Aloñak 70-65 irabazi dio Mungiari.

Partidu ona jokatu zuten arrasatearrek. "Bagenekien gogorra izango zela, eta nik esan nien jokalariei lasai egoteko, presioa besteek zutela", dio Larreategik. 

Lehenengo laurdena nahiko parekatua izan zen. Bigarren laurdenean, etxekoak lasaiago jokatzen hasi ziren, eta Venta de Baños hiruko saskiratze asko egiten hasi zen. Hori horrela, Larreategik hutsartea eskatu zuen. "Jokalariei esan nien barrutik gehiago jokatu behar genuela", dio entrenatzaileak.

21-5eko partziala

Atsedenaldira bost tanto atzetik joan ziren etxekoak. Hirugarren laurdenean gauzak goitik behera aldatu ziren. Arrasatearrak defentsan gogor ibili ziren eta oso eraginkorrak izan ziren saskiratzeak egiterakoan: 21-5eko partziala egin zuten. Markagailuan aurretik jartzeaz gain, taldea lasaitu egin zen.

Presioa kantxa guztira

Azkeneko laurdenean aurkariak presioa kantxa guztira zabaldu zuen, baina etxekoek markagailuan zeukaten abantaila nahikoa izan zen partidua eusteko.

"Gustura nago garaipenarekin eta baita tantoetan abantaila hartu dugulako. Oso garrantzitsua izango da liga parekatuta bukatuz gero", azaldu du Larreategik. "Lehenengo helburua partidua irabaztea zen, eta bigarrena tantoen aldea ere irabaztea", gaineratu du. Hala, han zortzi tantotako aldearekin galdu zuen MUk; etxean, aldiz, hamar tantoko aldearekin irabazi dute.

Natra Aloña Mendik ere irabazi

Natra Aloña Mendik 70-65 irabazi zion zapatuan Mungiari Zubikoa kiroldegian, bigarren mailako txapelketan. 20. jardunaldia amaituta, Aloña Mendi bosgarren postuan dago 30 punturekin. Datorren astean Goierriren aurka jokatuko dute, etxean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.