Inguruko herrietako jendea: Debagoiena, Debabarrena, Durangaldea, Bilbo eta beste. Era askotako dantzak: mazurka, eskotixa, jota, porrusalda, jauziak, korroko dantzak, kontradantzak, joko-dantzak, sokak, irradaka… Hurrengo hitzordua, martxokoa, 20an egingo dute, Aste Santua dela-eta.
"Lau pieza berri eskaini genituen domekako emanaldian: lotuan dantzatzeko zortziko bat, taldean egiteko eskotixa, korruan egiteko bals-kontradantza bat, eta azkenik, tango ezagun bat, Espaloiko tabernariari opari; argentinarra da, hemengo famili-jatorria duen arren. Horiez gain, ohiko errepertorio anitza: mazurka, eskotixa, jota, porrusalda, jauziak, korroko dantzak, kontradantzak, joko-dantzak, sokak, irradaka... Beti ere, dantza eta musika tradizionalekin osatutako emanaldia, entzuteko goxoa, baina batez ere elkarrekin dantzan gozatzeko". Patxi Montero irakasle eta gidariaren berbak dira.
Herrixa Dantzan dantzarako bilgunea da Debagoienean. Gaur egun bakarra, hasieran izan zen bezala. "Oso ondo pasatzen dugu" amaitu du Monterok.
