Debagoiena da Euskadiko eskualde berritzaileena

Azken urteotan bezala, Debagoiena da enpresa berritzaile gehien dituen eskualdea EAE osoan, Eustaten datuen arabera. Datu berriena hartzen da kontuan, hau da, 2014koa. Hamar langile edo gehiago dituzten enpresen %47,1 dira berritzaileak Debagoienean; EAEko batez bestekoa %37,1 da.

Gipuzkoa da lurralde berritzaileena. Hala, Gipuzkoako zazpi eskualdeetako bostean, hamar langile edo gehiagoko enpresen %40 baino gehiago ziren berritzaileak 2014an: Debagoienean, %47,1; Goierrin, %44,0; Tolosaldean, %41,8; Urola Kostan, %40,5; eta Donostialdean, %40,4. Araban, tamaina horretako enpresa berritzaileen presentzia handiena Kantauri Arabarra (%42,2) eta Arabako Besteak eskualdeetan (%40,7) dago. Azkenik, Bizkaian, %40tik behera bada ere, Durangaldea da berrikuntza egiten duten enpresen ehuneko altuena duen eskualdea (%38,9), eta atzetik Plentzia-Mungia (%38,4) eta Enkarterri (%36,9) ditu.

Enpresa berritzaile gutxien dituzten eskualdeei dagokienez, aipatzekoak dira Arabako Errioxa (%30,9), Markina-Ondarroa Bizkaian (%33,4) eta Bidasoa Beherea Gipuzkoan (%37,3).

Hiriburuetan berrikuntza egiten duten hamar langile edo gehiagoko enpresa berritzaileen 2014ko datuei erreparatuz gero, Donostia gailentzen da (%42,2); sei puntu baino gehiago ateratzen baitizkie Gasteizi (%36,1) eta Bilbori (%33,7).

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.