Gainezka egin du Deba ibaiak Bergaran

Bergarako Ibaiondo kalean, Deba ibaia bere ubidetik irtenda.

Deba ibaiak gainezka egin du Bergarako Ibaiondo kalean. Udaltzainek itxi egin dute kalea Marxiategi eta San Lorentzo lotzen dituen zubiaren azpian eta garaje batzuk hustu egin dituzte. Bestetik, errepidean arazoak sortu dira hainbat puntutan, ubide txikiak ur askorekin datozelako menditik eta luiziak izan direlako hainbat puntutan. Arrasateko Zerrajerako etxeetan ere arazoak sortu dira, luizi batek eta ur putzu handiek eraginda. 

Euri jasa etengabeen ondorioz, arazoak sortu dira errepidean, hainbat puntutan. Elorregi inguruan batez ere, Oñati, Bergara eta Arrasaterako noranzkoetan: San Prudentzio elizaren ondoan, Barrena baserritik gertu edota Zubillagara ailegatu baino lehenago. Ur putzu handiak sortu dira eta harri koskorrak ekarri dituzte menditik behera ur askorekin datozen ubideek.

Herrizaingo sailetik kaminoan erne ibiltzeko gomendatu dute. Zapaturako abisu laranja emanda zegoen "prezipitazio iraunkorrengatik" Bizkaian eta Gipuzkoan eta iragarpenak bete egin dira, gauera arte etenik barik egin duelako euria. Domekarako, abisu horia eman dute "prezipitazio iraunkorragatik" Bizkaian eta Gipuzkoan, eta "elurragatik barnealdean".

Bergarako Ibaiondo kalean, argazki gehiago:

Arrasaten ateratako argazkiak, Zerrajera inguruan:

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.